Sirako

O le Fa‘amasinoga Tonu ma le Tautala Poto

¹E lelei le a‘oa‘iga, ‘ae leaga le ita fa‘asulusulu;‘aua fo‘i le vaosia le fa‘amatalaga a lē ta‘uta‘u lana agasala. ²E pei o le eunuka na te fia toso se taupou, ³e fa‘apea le tagata na te faia fa‘amalosi se fa‘amasinoga e lē tonu. ⁴Se mea ‘ua lelei le fa‘aali le loto salamō pe a a‘oa‘oina oe,auā o le ala lea ‘e te ‘alo ‘ese ai i le agasala o le loto. ⁵‘Ua i ai le tasi e fa‘alologo, a ‘ua aliali mai ai lona poto,‘ae ‘ua ‘inosia le tasi ‘ona o le so‘ona tautala. ⁶‘Ua i ai le tasi e fa‘alologo ‘ona ‘ua lē maua ni ana ‘upu,‘ae i ai le tasi e fa‘alologo ‘ona ‘ua masino ‘iā te ia le itū aso tatau. ⁷E fa‘alologo le tagata poto se‘ia o‘o i le itū aso tatau,a o le tagata mamapo ma le lē mafaufau na te lē iloa ni itū aso. ⁸O lē tautala i ni ‘upu e tele e fa‘aleaga lava ia ‘iā te ia lava,a o lē so‘ona fiapule ma le fa‘alētatau e ‘inosia lava ia.

O le Suia Fa‘afuase‘i o le Manuia i le Malaia

⁹O le tagata amioletonu e manuia lava ia i mea leaga,a o se mea lelei ‘ua na maua, o le a fano ai lava ia. ¹⁰‘Ua i ai le mea alofa ‘ua faifua,e i ai ma le mea alofa e fa‘alua ‘ona tauia mai. ¹¹O le tasi ‘ua māui lona ta‘uleleia pe a fa‘amamaluina,a o le tasi ‘ua fa‘amasiasi o ia, ‘ae fa‘aea ai o lona ulu. ¹²O le tasi ‘ua fa‘atau mai ni ana mea e tele i se tau ‘ua itiiti fua,‘ae ‘ua sili fa‘afitu i le tau e tusa ai. ¹³O lē poto i ana ‘upu e alofagia o ia,‘ae maumau lava o ‘upu alofa a le vale. ¹⁴E lē aogā ‘iā te oe le mea alofa a le vale,auā e sautuafitu ona mata. ¹⁵E itiiti lana mea e foa‘i mai, ‘ae tele lana ‘ote mai ai,a matala mai lona gutu, e pei e oso mai ai le afi. ¹⁶O le asō e nonō mai ai se mea e ia,a e a taeao, e tagi mai i le fa‘afo‘i atu; e ‘inosia le tagata e fa‘apenā. ¹⁷O le vale e fa‘apea ane: “‘Ua leai ni ana uō, e le o‘otia se loto i ana mea alofa.” ¹⁸O ē ‘a‘ai i ana mea e ‘ai ‘ua pepelo o latou laulaufaiva.Pe fa‘afia ‘ea e ulagia lava ia e le to‘atele! ¹⁹Auā e lē masino i lona mafaufau o mea e tatau ‘ona ia tāofia,e fa‘apea fo‘i ma mea e tatau ‘ona ia avatua.

O le Tagata Tautala So‘o e Tupu ai le Mā

²⁰O lē ‘ua pa‘ū ‘ona o lona laulaufaiva pepelo, e sili ‘iā te ia pe ‘ana pa‘ū faō i le ‘ele‘ele;e fa‘apea ‘ona fa‘afuase‘i mai ‘ona fano o ē amio leaga! ²¹O le tagata fa‘asoesā ‘ua pei o se tala fatufua,‘ua ta‘u so‘o lava e laugutu o ē ‘ua lē a‘oa‘oina. ²²E lē talileleia le fa‘ata‘oto a‘i laugutu o le vale,auā na te lē ta‘u maia i le itū aso tatau. ²³O le tasi ‘ua lē agasala lava ia, ‘ona o lona mativa;‘ua nofonofo fua o ia, ‘ae tu‘inanau i le agasala. ²⁴O le tasi e fano ‘ona ‘ua mā lava ia; e fano lava ia i tagata lē mafaufau,e fano ‘ona ‘ua fa‘ailogaina tagata e ia. ²⁵O le tasi ‘ua folafola atu se mea i lana uō,‘ona ‘ua mā lava ia, ‘ona ‘avea fua ai lea o lenā uō e fai mōna fili.

O le Pepelo

²⁶O le talapepelo, o le ila matagā lea i le tagata;e maua so‘o lava i laugutu o tagata ‘ua lē a‘oa‘oina. ²⁷‘Ua feoloolo le tagata gaoi, ‘ae leaga le tagata ‘ua saga talapelo;a o lo lā‘ua tofi, o le fanoga lea. ²⁸O le fua lava lea o le talapepelo, o le fa‘aleaga lava i tagata,e tumau pea ‘iā te i latou lo latou māsiasi.

O le Tautala ma le Poto

²⁹O lē poto i ana ‘upu e ta‘uleleia ai lava ia,a o le tagata mafaufau e fiafia i ai o ē mamalu. ³⁰‘Ai se tasi e fa‘ato‘a lona fanua, e maua mai ai e ia fa‘aputuga saito e tele;o lē tauivi i le amiotonu, e fa‘amamaluina ai o ia,a o lē fa‘afiafia i tagata mamalu e ‘alo ‘ese o ia i galuega leaga. ³¹O mea alofa ma mea foa‘ifua e fa‘atauaso a‘i mata o le fa‘amasino;e pei fo‘i o se momono i le gutu, e tāofia ai o a‘oa‘iga. ³²O le poto e nanā, o le ‘oloa ‘ua lilo, se a se aogā o mea ia e lua? ³³E feoloolo le tagata na te natia lona valea,‘ae leaga lē na te natia lona poto.