1 Na faia e le Atua le tagata i le ‘ele‘ele, na ia faia lava i lona fa‘atusa.
2 ‘Ae ‘ua toe fa‘afo‘i atu o ia i le ‘ele‘ele ma ‘ua na tu‘uina mai ‘iā te ia le malosi ‘ua tatau ma ia.
3 ‘Ua tu‘u mai ‘iā te ia ona aso ‘ua uma ‘ona fuaina,ma le sologa o itūlā ma ‘ua tu‘u mai ‘iā te ia le pule i mea uma ‘ua i le lalolagi.
4 ‘Ua na tu‘uina atu le mata‘u ‘ona o ia i mea ola uma lava, ma ‘ua ia tu‘u mai ‘iā te ia le pule i manu vaefā ma manu felelei.
5 ‘Ua na faia, ai lona tino, o sona fesoasoani e tatau ma ia;‘ua na tu‘u mai i tagata le mafaufau sa‘o,le laulaufaiva, o mata ma taliga, ‘atoa ma le loto e mafaufau ai,ma ‘ua na fa‘atumuina i latou i le poto ma le atamai.
6 ‘Ua na foa‘i mai ‘iā te i latou le poto fa‘aleagaga, ‘ua na fa‘atumu o latou loto i le mafaufau,‘ua na fa‘aali mai ‘iā te i latou le lelei ma le leaga.
7 ‘Ua na tu‘u mai ona fofoga i o latou loto e fa‘aali mai ai ‘iā te i latou le mamalu o ana galuega;
8 ‘ina ‘ia latou vivi‘i atu ai i lona suafa pa‘ia,‘ina ‘ia latou mitamita i ana galuega ofoofogia,ma ‘ia latou tala‘i atu le mamalu o mea na ia faia.
9 ‘Ua ia tu‘u mai ‘iā te i latou ma le a‘oa‘oga, ‘ua fai mo latou tofi le tulafono o le ola.
10 ‘Ua na osi le feagaiga e fa‘avavau fa‘atasi ma i latou,ma ‘ua fa‘aali mai ‘iā te i latou ana tulafono māna fa‘amasinoga.
11 Na iloa e o latou mata le ofoofogia o lona mamalu, ‘ua fa‘alogo o latou taliga i le mamalu o lona si‘ufofoga.Ma ‘ua fetalai atu ‘iā te i latou:“‘Ia ‘outou matuā ‘alo ‘ese i le amio leaga!”
12 Ma ‘ua tu‘u mai ‘iā te i latou ta‘ito‘atasio poloa‘iga e fa‘asino i o latou uso tagata.
13 O latou ala ‘ua i ai pea i ona luma,e lē lilo lava i ona fofoga.
14 ‘Ua na tofia se pule i nu‘u ta‘itasi;
15 a o le tofi o le Atua ‘ua fa‘aalia, o Isaraelu lava lea.
16 O a latou galuega uma ‘ua i ona luma, e pei o le lā,o latou ala ‘ua silasila ifo i ai ona fofoga, e lē aunoa.
17 ‘Ua lē tautineia o tulafono ‘iā latou amio leaga,a ‘ua i luma o le Atua o a latou soligātulafono uma lava.
18 O le galuega alofa a le tagata ‘ua ‘iā te ia, e pei o se fa‘amaufa‘ailoga;na te tausia fo‘i le galuega lelei a le tagata e pei o lona tamatama‘imata.
19 Mulimuli ane, ‘ona tula‘i lava lea o ia ma tu‘u mai ‘iā te i latou lo latou taui,ta‘ito‘atasi ma tali lana mea, ‘ona fa‘aliliu lea i latou i lalo i le ‘ele‘ele.
20 ‘Ae ui i lea, ‘ua ia tu‘u mai i ē salamō le ala o le amiotonu;‘ua ia fa‘amausalī i ē ‘ua lē lavā ‘onosa‘i, ‘ua ia tu‘u mai le ‘upu moni e fai mo latou tofi.
21 ‘Ia toe fo‘i atu i le Ali‘i, ma ‘ia e lafoa‘i i au agasala.
22 ‘Ia e fa‘atoga atu i luma o le Ali‘i ma ‘ia e fa‘amāui au soligātulafono.
23 ‘Ia e toe fo‘i atu i le Ali‘i ma ‘ia e ‘alo ‘ese i lau amio leagama ‘ia e matuā ‘ino‘ino i mea e ‘inosia.
24 ‘Ia e ta‘utino atu fo‘i le amiotonu a le Atua māna fa‘amasinoga;‘ia e mautū lava i le tulaga ‘ua na tu‘uina mai ai oe,ma e tatalo i le Atua silisili ‘ese.
25 ‘Ia e mautofi fa‘atasi ma le tupulaga pa‘ia, o ē ola ma ‘ua latou vivi‘i atu i le Atua.
26 ‘Aua ‘e te mautū i le sesē o ē amio leaga;‘ia e vivi‘i atu i le Atua a o le‘i o‘o le oti ‘iā te oe;e lē mafai se vi‘iga e lē ‘ua oti, ‘ua pei o le leai lava ia.
27 ‘Ia e vivi‘i atu i le Atua i aso o lou ola; a e maua le ola ma le tino malosi,‘ona e vivi‘i atu ai lea ma fa‘amamalu i le Atua,‘e te mitamita lava i lona agaalofa.
28 ‘Ua matuā tele le agaalofa o le Ali‘i, ma lona fa‘amāgalo i ē fo‘i atu ‘iā te ia!
29 Auā e lē mafai ‘ona ‘ato‘atoa le lelei o le tagata, ‘ona ‘ua ‘augavale le atali‘i o le tagatama ‘ua latou fiafia i le fa‘atauva‘a o le amio leaga.
30 E silisili lava le pupula o le lā, ‘ae o‘o lava ‘ina pogisā o ia.E sili fo‘i le leaga o mea e mafaufau i ai le tino ma le toto, ‘ae fa‘asalaina ai lava ia.
31 E tepa le lā i ‘au o le lagi i lugā,a o tagata o le efuefu ma le lefulefu o i latou uma. #