1 Koma Yobu anayankha, nati,
2 Mwenzi atayesa bwino cisoni canga,Ndi kuika matsoka anga pamodzi pamuyeso!
3 Pakuti zikadalemera tsopano koposa mcenga wa kunyanja;Cifukwa cace mau anga ndasonthokera kunena.
4 Pakuti mibvi ya Wamphamvuyonse yandilowa,Mzimu wanga uumwa ulembe wace;Zoopsa za Mulungu zindindandira nkhondo.
5 Kodi mbidzi ilira pokhala nao msipu?Ilira kodi ng'ombe pa cakudya cace?
6 Kodi cinthu cosakolera cidyeka copanda mcere?Coyera ca dzira cikolera kodi?
7 Zimene moyo wanga ukana kuzikhudzaZikunga cakudya cosakolera kwa ine.
8 Ha! ndikadakhala naco cimene ndicipempha,Mulungu akadandipatsa cimene ndicilira!
9 Cimkomere Mulungu kundiphwanya,Alole dzanja lace lindilikhel
10 Pamenepo ndidzasangalala,Ndidzakondwera naco cowawa cosandileka;Pakuti sindinawabisa mau a Woyerayo.
11 Mphamvu yanga njotani kuti ndiyembekeze?Mathedwe anga ndi otani kuti ndipirire?
12 Kodi mphamvu yanga ndiyo mphamvu ya miyala?Mnofu wanga ndi mkuwa kodi?
13 Mulibe thandizo mwa ine ndekha; cipulumutso candithawa.
14 Iye amene akadakomoka, bwenzi lace ayenera kumcitira cifundo;Angaleke kuopa Wamphamvuyonse.
15 Abale anga anacita monyenga ngati kamtsinje,Ngati madzi a timitsinje akupitirira.
16 Amada cifukwa ca madzi oundana.M'menemo cipale cofewa cibisika;
17 Atafikira mafundi, mitsinje iuma;Kukatentha, imwerera m'malo mwao.
18 Aulendo akutsata njira yao apambukapo,Akwerera poti se, natayika.
19 Aulendo a ku Tema anapenyerera,Makamu a ku Seba anaiyembekezera.
20 Anazimidwa popeza adaikhulupirira;Anafikako, nathedwa nzeru.
21 Pakuti tsopano mukhala mamwemo;Muona coopsa, mucitapo mantha.
22 Ngati ndinati, Mundipatse?Kapena, Muperekeko kwa ine cuma canu?
23 Kapena, Mundilanditse m'dzanja la mdani?Kapena, Mundiombole m'dzanja la oopsa?
24 Mundilangize, ndipo ndidzakhala cete ine;Mundizindikiritse umo ndinalakwira.
25 Mau oongoka si ndiwo amphamvu?Koma kudzudzula kwanu mudzudzula ciani?
26 Kodi muyesa kudzudzula mau?Popeza maneno a munthu wodololoka akunga mphepo.
27 Indetu, mugwetsera wamasiye msampha,Mumkumbira bwenzi lanu mbuna.
28 Koma tsopano balindani, mundipenyerere;Ndikanena bodza pamaso panu mudzalizindikira.
29 Bwererani, ndikupemphani, musandiipsire mlandu;Inde, bwereraninso, mlandu wanga ngwolungama.
30 Kodi pali cosalungama palilime panga?Ngati sindizindikira zopanda pace m'kamwa mwanga?