1 Eitse ha Abrame e se e le motho ya dilemo tse mashome a robileng mono o le mong a metso e robileng mono o le mong, Jehova a iponahatsa ho Abrame, a re ho yena: Ke nna Modimo o matla wohle. Tsamaya pela ka, o be kgabane;
2 mme ke tla tiisa selekane sa ka, se mahareng a ka le wena, ke o atise haholoholo.
3 Yaba Abrame o wa ka sefahleho, mme Modimo wa nna wa bua le yena, wa re:
4 Haele nna, bona, selekane sa ka se ho wena, mme o tla ba ntata letshwele la ditjhaba.
5 Lebitso la hao ha ho sa tla thwe ke Abrame (ntate ya phahameng), empa lebitso la hao e tla ba Abrahama, hobane, ke o beile hore o be raditjhabatjhaba.
6 Ke tla o atisetsa bana haholoholo, ke o etse ditjhaba, mme marena a tswe ho wena.
7 Ke tla tiisa selekane sa ka, se mahareng a ka le wena, le ditloholo tsa hao tse o hlahlamang ka meloko ya tsona, e be selekane se sa feleng, ke be Modimo wa hao le wa leloko la hao le o hlahlamang.
8 Mme lefatshe la bojaki ba hao, lefatshe lohle la Kanana, ke le nea wena le ditloholo tsa hao tse kamora hao, le le rue ka ho sa feleng, mme ke tla ba Modimo wa bona.
9 Modimo wa ba wa re ho Abrahama: Haele wena, o boloke selekane sa ka, wena le ditlholo tsa hao tse kamorao ho wena.
10 Ke wena selekane sa ka seo le tlang ho se boloka, se mahareng a ka le lona, le ditloholo tsa hao tse kamora hao: Ba batona bohle ho lona ba bolotswe.
11 Le pome nama ya ntlha ya dipele tsa lona, mme e tla ba pontsho ya selekane sa ka le lona.
12 Ngwana ya matsatsi a robileng meno e le mmedi hara lona a bolotswe, ba batona kaofela melokong ya lona, ya tswallwang tlung, leha e le ya rekilweng ka tjhelete ho moditjhaba ofe le ofe, eo e seng wa mofuta wa hao.
13 Ho bolotswe ya tswallwang tlung ya hao, le ya rekwang ka tjhelete ya hao, selekane sa ka se be nameng ya lona, e be selekane se sa feleng.
14 Motho e motona wa leqai ya sa bolotswang nameng ya hae, motho eo o tla kgaolwa setjhabeng sa hae, hobane o sentse selekane sa ka.
15 Hape Modimo wa re ho Abrahama: Sarai, mosadi wa hao, ha a sa tla hlola a bitswa ka lebitso la Sarai (ya ikgethang), empa lebitso la hae e tla ba Sara (mofumahadi).
16 Mme ke tla mo hlohonolofatsa, hape ke tla o fa mora ka yena; mme ke tla mo hlohonolofatsa, e tla ba mma ditjhaba, mme marena a ditjhaba a tla tswa ho yena.
17 Yaba Abrahama o wa ka sefahleho, a tsheha, mme a re ka pelong ya hae: Na monna ya dilemo tse lekgolo a ka bona ngwana, le Sara ya dilemo tse mashome a robileng mono o le mong, hleka a ka beleha na?
18 Abrahama a re ho Modimo: Ishmaele a ke a phele pela hao!
19 Modimo wa re: Tjhe, Sara, mosadi wa hao, o tla o tswalla mora, mme o tla mo rea lebitso la Isaaka; ke tla tiisa selekane sa ka le yena, le leloko la hae le kamora hae, e be selekane se sa feleng.
20 Haele bakeng sa Ishmaele, ke o utlwile: Bona, ke tla mo hlohonolofatsa, ke mo atise, ke mo ngatafatsa haholoholo; o tla tswala marena a leshome le metso e mmedi, mme ke tla mo etsa setjhaba se seholo.
21 Empa selekane sa ka ke tla se tiisa le Isaaka, eo Sara a tlang ho o tswalla yena isao, wona motsotsong ona.
22 Yaba o lesa ho bua le yena, mme Modimo wa myoloha, wa tloha ho Abrahama.
23 Yaba Abrahama o nka Ishmaele, mora wa hae, le bohle ba tswaletsweng tlung ya hae, le bohle ba rekilweng ka tjhelete ya hae, ba batona bohle ba ntlo ya Abrahama, a ba bolotsa ka lona letsatsi leo, kamoo Modimo o mmoleletseng kateng.
24 Abrahama e ne e le motho ya dilemo tse mashome a robileng mono o le mong a metso e robileng mono o le mong, mohla a bolotswang;
25 mme Ishmaele, mora hae, o ne a na le dilemo tse leshome le metso e meraro, mohla a bolotswang.
26 Ka lona tsatsi leo, Abrahama a bolla le Ishmaele, mora hae,
27 le banna bohle ba tswaletsweng tlung ya hae, le ba rekilweng ka tjhelete ho baditjhaba, ba bolla le yena.