1 Le ALI‘I e,se a le mea ‘e te tūtūmamao ai,ma e liliu ‘ese ai i ona po e i ai le puapuagā?
2 O le fa‘amaualuga o le tagata amio leaga,‘ua ia matuā fa‘asauā ai i ē ‘ua puapuagātia;‘ua maua i latou i ia lava togafiti na latou manatua.
3 Auā ‘ua mitamita lē amio leaga i tu‘inanau o lona loto;o lē ‘ua matape‘ape‘a fo‘i,‘ua fa‘a‘amu‘ia o ia e ia, ‘ua ‘ino‘ino i le ALI‘I.
4 O le fa‘asiasia o mata o lē ‘ua amio leaga e lē sā‘ili ai o ia;o ona mafaufau uma, “E leai se Atua.”
5 ‘Ua manuia ona ala e lē aunoa;‘ua mamao i luga ‘iā te ia au fa‘amasinoga;‘ua na ulafia i ē ita ‘iā te ia uma lava.
6 ‘Ua fai ifo ia i lona loto,“E lē fa‘agae‘etia a‘u;e lē o‘o mai se mea leaga ‘iā te a‘u e fa‘avavau.”
7 ‘Ua tumu lona gutu i le fetu‘u ma le tau‘ole‘ole, ma le sauā;o lo‘o i lalo o lona laulaufaiva le fa‘atigā ma le amio leaga.
8 ‘Ua nofo ia i mea e lamalama ai i faoa ‘a‘ai,na te fasi oti i mea lilo i ē lē sala;‘ua lamalama ona mata i lē ‘ua tigāina.
9 ‘Ua lamalama ia i le mea lilo, e pei o le leona i le mea e fale ai;‘ua lamalama ia ‘ina ‘ia pu‘ea e ia o lē ‘ua puapuagātia;‘ua pu‘ea e ia lē ‘ua puapuagātia, i lona toso mai ‘iā te ia i lana ‘upega.
10 ‘Ua lafotūina ‘ona ‘ua momomo,‘ua pa‘u‘ū fo‘i ē ‘ua tigāina i lana ‘au malosi.
11 ‘Ua fai ifo o ia i lona loto,“‘Ua galo i le Atua;‘ua ‘alo ‘ese ona fofoga; na te lē silafia e fa‘avavau.”
12 Le ALI‘I e,‘ia e tula‘i mai;le Atua e ‘inā si‘i ia lou ‘a‘ao;‘aua ne‘i galo ‘iā te oe ē ‘ua puapuagātia.
13 Se a le mea ‘ua ‘ino‘ino ai i le Atua lē ‘ua amio leaga?‘Ua fai ifo i lona loto, “‘E te lē su‘esu‘ea.”
14 ‘Ua e silafia lava, auā o oe lava,‘e te silasila i le tigā ma le ita,‘ina ‘ia tu‘u atu ai i lou ‘a‘ao;o lē ‘ua tigāina e tu‘uina o ia e ia ‘iā te oe;o oe lava o le fesoasoani o lē ‘ua mātuaoti.
15 ‘ia e gagau le lima o lē fai amio leaga;o lē agaleaga fo‘i, ‘ia e su‘esu‘e i lana amio leaga se‘ia e lē toe silafia.
16 O le ALI‘I o le Tupu ia e fa‘avavau fa‘avavau lava;‘ua fano nu‘u ‘ese nai lona lau‘ele‘ele.
17 Le ALI‘I e,‘ua e fa‘afofogaina le mana‘o o ē ‘ua puapuagātia;e fa‘amauina e oe o latou loto, ‘ua liliu mai i ai ou fofoga.
18 ‘Ina ‘ia fa‘amasino i lē ‘ua mātuaoti ma lē ‘ua fa‘asauāina;‘ina ‘ia lē toe fa‘amata‘u mai le tagata ‘ua tupu mai le ‘ele‘ele.