1 ‘Amu‘ia le tagata ‘ua fa‘amāgaloina lona solitulafono,ma ‘ua ufitia lana agasala.
2 ‘Amu‘ia le tagata e lē ta‘usalaina e le ALI‘I,e leai fo‘i se ‘ole‘olega i lona loto.
3 Na ‘ou fa‘alologo, ‘ona palagia ai lea o o‘u ivii lo‘u fa‘ataiō i le aso ‘atoa.
4 Auā sa mamafa lou ‘a‘ao i luga ‘iā te a‘u i le ao ‘atoa fo‘i ma le po;‘ua liua lava lo‘u malosi i le vevela o le tausaga vevela. Selā.
5 ‘Ona ‘ou fa‘ailoa atu ai lea ‘iā te oe o la‘u agasala,na ‘ou lē ufitia fo‘i la‘u amioletonu;sa ‘ou fa‘apea, “‘Ou te fa‘aali atu i le ALI‘I ‘ou solitulafono;”‘ona e ‘ave‘esea ai lea o le leaga o la‘u agasala. Selā.
6 O le mea lea e tatalo atu ai ‘iā te oe,o ē amio Atua uma lava, i ona po e maua ai oe;e moni, e lē o‘o ‘iā te i latou tāfega o vai e tele.
7 O oe lava lo‘u lafitaga,‘e te leoleoina a‘u i le puapuagā,‘e te si‘osi‘omia a‘u i siva o le olataga. Selā.
8 ‘Ou te a‘oa‘o ‘iā te oe,ma fa‘asino ‘iā te oe i lea lava ala ‘e te savali ai;‘ou te fa‘atonu ‘iā te oe ma ‘ou va‘ai ‘iā te oe.
9 ‘Aua ‘e te fa‘apei o le solofanua, po o le falata,e lē o i ai se mafaufau,o latou teuga o le fa‘agutu ma le tāofi e tāofi ai,auā ‘ua latou lē fa‘alatalata mai ‘iā te oe.
10 E tele mea tigā e o‘o i ē amio leaga;a o lē fa‘atuatua i le ALI‘I si‘omia o ia i le alofa.
11 ‘Inā fiafia ia i le ALI‘I,ma ‘oli‘oli o ‘outou o ē amiotonu;‘inā ‘alalaga ia ma le fiafia o ‘outou uma o ē ‘ua fa‘amaoni o ‘outou loto.