1 Lo‘u agaga e, ‘ia e fa‘amanū atu i le ALI‘I;le ALI‘I e, lo‘u Atua, e matuā silisili lava oe,e ‘ofu oe i le vi‘iga ma le matagofie.
2 O lo‘o e pulupulu i le malamalama pei o se ‘ie pulupulu;o lo‘o e fofola le lagi fa‘apei o se ‘ie puipui.
3 O lo‘o faia e ia o ona afeafe aupitoaluga i le vai;o lo‘o faia e ia o ao mōna nofoa fa‘ata‘avalevale;e feafioa‘i o ia i ‘apa‘au o le matagi.
4 O lē fai o matagi ma ana agelu,o ana ‘au‘auna o le afi mumū ia.
5 O le na fa‘avaeina le lalolagi i luga o ona lava fa‘avae,‘ina ‘ia lē gae‘e e fa‘avavau fa‘avavau lava.
6 ‘Ua e ufitia ia i le moana e pei o se ‘ofu;o le vai ‘ua lofia ai mauga.
7 O lau a‘oa‘i atu na sola ai o ia,na ta‘alise atu i le leo o lou faititili.
8 ‘Ua ō a‘e mauga, ‘ua ō ifo vanu,e o‘o i lea lava mea na e saunia mo i latou.
9 ‘Ua e tu‘uina i ai le tuā‘oi ne‘i sopo‘ia e ia,ne‘i toe fo‘i mai ia e lofia le lau‘ele‘ele.
10 ‘Ua aunai atu e ia o vaipuna i vanu,‘ua tafe ia i vā o mauga.
11 E inu ai manu uma lava o le vao,e malilie ai fo‘i asini o le vao.
12 E nonofo latalata ane i ai o manu felelei,e lagona o latou leo i totonu o la la‘au.
13 O lē fa‘asūsū mauga mai ona afeafe aupitoaluga;o fua o au galuega e mā‘ona ai le lau‘ele‘ele.
14 ‘Ua fa‘atupu e ia mutia mo manu vaefā,‘atoa ma mea totō e aogā i tagata;e fa‘atupu mai le mea e ‘ai i le ‘ele‘ele;
15 ma le uaina e fa‘afiafia ai loto o tagata,‘ina ‘ia pupula ai o latou mata e sili i le suāu‘u,o le mea e ‘ai fo‘i e malosi ai tagata.
16 ‘Ua lauolaola la‘au o le ALI‘I,o arasi o Lepanona na totōina e ia.
17 E fai ai e manu iti o latou ōfaga;o le kasita o i perosi lona fale.
18 O mauga maualuluga ma ‘oti o le vao ia;o papa o mea ia e malu ai sefanai.
19 Na ia faia le masina e ‘atofaina ai aso;‘ua iloa e le lā le mea e goto i ai.
20 ‘Ua e faia le pouliuli, ‘ona po lava lea,e fetolofi mai ai o manu fe‘ai uma lava o le vao.
21 ‘Ua tagi leona ta‘anoa i mea e saeia,ma sā‘ili‘ili mai le Atua la latou mea e ‘ai.
22 ‘Ua alu a‘e le lā, ‘ona fa‘apotopotoina ai lea o i latou,ma ta‘o‘oto i o latou ana.
23 E alu atu ai le tagata i lana galuega,ma ana mea e fai se‘ia o‘o i le afiafi.
24 Le ALI‘I e,‘ua matuā tele au galuega.‘Ua e faia ia mea uma i le poto;‘ua tumu le lalolagi i au ‘oloa.
25 O lenei sami tele ma le lautele,o i ai mea fetolofi e lē masino,o mea ola iti ‘atoa ma ē tetele.
26 E feoa‘i ai va‘a;o le leviatana na e faia e ta‘alo ai.
27 O lo‘o fa‘atalitali ia mea uma ‘iā te oe‘ina ‘ia e avatu i ai la latou mea e ‘ai i ona aso e tatau ai.
28 ‘E te avatua i ai, ‘ua fa‘aputuina e i latou;‘e te fa‘amafolafola lou ‘a‘ao,‘ua mā‘o‘ona ai i latou i mea lelei.
29 ‘Ua ‘alo ou fofoga, ‘ona atuatuvale ai lea o i latou;‘ua e ‘ave‘eseina a latou mānava,‘ona mamate ai lea, ‘ua toe liu efuefu.
30 ‘E te ‘auina atu lou Agaga, ‘ua faia ai i latou;‘e te toe fuata‘iina fo‘i le fogā‘ele‘ele.
31 E tumau le mamalu o le ALI‘I e fa‘avavau;e fiafia le ALI‘I i ana mea na fai.
32 E silasila mai o ia i le lalolagi, ‘ona gatete ai lea;e papa‘i atu ia i mauga, ‘ona pupusa ai lea.
33 ‘Ou te pese i le ALI‘I i lo‘u nei olaga;‘ou te fai pesega i lo‘u Atua a o ‘ou ola.
34 E malie lo‘u mafaufau ‘iā te ia;‘ou te fiafia lava a‘u i le ALI‘I.
35 E fa‘aumatia o ē agasala a‘i le lalolagi,ma ē amio leaga e lē toe i ai i latou.Lo‘u agaga e, ‘ia e fa‘amanū atu i le ALI‘I.‘Ia ‘outou vivi‘i atu i le ALI‘I.