1 Le Atua e,‘ia e fa‘afofoga mai i la‘u tatalo,‘aua fo‘i ‘e te liliu ‘ese i la‘u ‘ai‘oi atu.
2 ‘Ia fa‘afofoga mai ‘iā te a‘u,ma tali mai ‘iā te a‘u;‘ua ‘ou fa‘anoanoa i lo‘u mafaufau ma ‘ou uiō;
3 ‘ona o le leo o lē ‘ua ita mai,‘ona o le sauā o lē amio leaga;auā ‘ua latou fa‘ao‘o mai ‘iā te a‘u le amio leaga,o le ita lava ‘ua latou fa‘asauā mai ai ‘iā te a‘u.
4 ‘Ua sapotuvale lo‘u lava loto i totonu ‘iā te a‘u;‘ua o‘o mai fo‘i ‘iā te a‘u le mata‘u i le oti.
5 ‘Ua o‘o mai lava ‘iā te a‘u le mata‘u ma le gatete;‘ua matuā fa‘agateteina a‘u.
6 ‘Ona ‘ou fa‘apea lea,“E! tā fia maua ‘apa‘au e pei o le lupe,‘ou te lele ‘ese ai lava, i le ‘ou nofo mau ai.
7 Fa‘auta, ‘ou te sola mamao atu lavai le ‘ou nofo ai i le vao. Selā.
8 ‘Ou te fa‘ata‘alise ‘ona sola o a‘u,‘ona o le matagi tetele ma le afā.”
9 Le ALI‘I e,‘ia e fa‘aumatia latou,‘ia e vaeluaina a latou taupulepule.Auā ‘ua ‘ou iloa le sauā ma le misa i le ‘a‘ai.
10 ‘Ua la si‘omia o ia i ona pā i le ao ma le po;‘ua i totonu lava ‘iā te ia le amio leaga ma le malaia.
11 ‘Ua i totonu lava ‘iā te ia le amio pa‘a‘ā;e lē alu ‘ese lava i lona malae le sauā ma le amio pepelo.
12 Auā e lē o se fai a‘u mōna fili na ‘upuleagaina a‘u;ana se ita mai, po ‘ua ‘ou ‘o‘ono ai;e lē o lē ita mai ‘iā te a‘u na fa‘asausili mai ‘iā te a‘u;ana se ita mai, po ‘ua ‘ou lafi ‘iā te ia.
13 A o oe lava, o le tagata tā te tutusa ma a‘u;o la‘u uō lava, o lē ‘ua tā masani.
14 Sa fefa‘amaliea‘i lava a tā tautalaga,sa tā o gatasi ma le vao tagata i le fale o le Atua.
15 ‘Ia fa‘afuase‘i atu lava le oti ‘iā te i latou;‘ia latou ō ifo o ola i seoli;auā ‘ua i ai mea leaga i mea o latou nonofo ai,o i totonu ‘iā i latou lava.
16 O a‘u nei, ‘ou te vala‘au atu i le Atua;o le ALI‘I lava na te fa‘aolaina mai a‘u.
17 O le afiafi ma le taeao ma le tutonu o le la,‘ou te tagi ai ma ‘ou uiō;‘ona fa‘afofoga mai ai lea o ia i lo‘u leo.
18 Na ia lavea‘i mai ‘iā te a‘u,‘ia ‘ou filemū ai i le tau‘a sa ‘iā te a‘u;auā e to‘atele i latou sa ‘iā te au.
19 E fa‘afofoga mai le Atua,na te fa‘atigāina fo‘i i latou,o ia lava lea o lo‘o ti‘eti‘e talu mai le vavau lava.Auā latou te lē āu liliu lavama ‘ua latou lē matata‘u i le Atua.
20 ‘Ua ia fa‘ao‘o atu ona lima i ē ‘ua nofo lelei ma ia;‘ua tu‘umavaega ai o ia.
21 O lona gutu ‘ua se suāsusu ‘ua to‘a e molemole,a o i lona loto le tau‘a;e sili le malūlū o ana ‘upu i le suāu‘u,a o pelu ‘ua se‘ia lava ia.
22 ‘Ia e tu‘uina atu i le ALI‘I o mea ‘e te popole vale ai;o ia lava na te tausia oe;na te lē tu‘ua e fa‘avavaule amiotonu ‘ia fa‘agae‘etia.
23 A o oe, le Atua e,‘e te lafoina i lalo i latou i le tō e fano ai;o tagata ‘ua totolima ma ē pepelo,latou te lē o‘o i le tautuluaga o latou aso;a o a‘u, ‘ou te fa‘atuatua lava ‘iā te oe.