1 ‘Ia ‘outou vivi‘i atu i le ALI‘I.Auā e lelei ‘ona fai pesega i lo tatou Atua;auā e matagofie, e ono lava le vi‘iga.
2 O lo‘o atiina a‘e Ierusalema e le ALI‘I;e fa‘apotopotoina e ia o Isaraelu sa tulia.
3 E fa‘amālōlōina e ia ē ‘ua loto momomo;e fufusi e ia o latou manu‘a.
4 O lo‘o faitaulia e ia le aofa‘i o fetū;‘ua fa‘aigoaina e ia o latou igoa uma lava.
5 E silisili lava lo tatou Ali‘i, e tele lona malosi;e lē ma fa‘amatalaina lona poto.
6 E lagolago le ALI‘I i ē ‘ua puapuagātia;‘ae lafotūina e ia ē ‘ua amio leaga ‘ia to‘ele.
7 ‘Ia ‘outou pepese atu i le ALI‘I i le vi‘iga;‘ia ‘outou fai pesega i lo tatou Atua i le kitara.
8 O lē ufitia le lagi i ao, o lē saunia le timu mo le ‘ele‘ele;o lē fa‘atupu le mutia i mauga.
9 O lē avatu i le manu vaefā lana mea e ‘ai,e fa‘apea fo‘i i le toloa‘i a le oreva, pe a tagi ‘iā te ia.
10 E lē fiafia o ia i le malosi o le solofanua;e le finagalo ia i vae o le tagata.
11 O lo‘o finagalo le ALI‘I i ē matata‘u ‘iā te ia,o ē fa‘amoemoe i lona alofa.
12 Ierusalema e, ‘ia e vivi‘i atu i le ALI‘I;Siona e, ‘ia e vivi‘i atu i lou Atua.
13 Auā o lo‘o fa‘amalosia e ia o fa‘amau fa‘alava o ou puipui;o lo‘o fa‘amanuia e ia lau fānau i totonu ‘iā te oe.
14 O lē fa‘atupu le filemū i ou tuā‘oi;o lē fafaga ‘iā te oe ‘ia mā‘ona i le saito e sili ‘ona lelei.
15 O lo‘o ‘auina mai e ia lana poloa‘iga i le nu‘u,e momo‘e tele vave lana afioga.
16 O lē ‘auina mai le kiona e pei o fulufulu mamoe;o lē na te lūlūsoloina le sauto‘a e pei o lefulefu.
17 O lē ‘auina mai lana vaito‘a pei o momoi mea.O ai sē na te tula‘i i luma o lona ma‘alili?
18 E tulei mai lana afioga, ‘ona liu suāvai ai lea o ia mea;e fa‘aagi mai e ia lona matagi, ‘ona tafe mai ai lea o vai.
19 Na te fa‘aalia ana afioga ‘iā Iakopo;o ana tulafono ma fa‘amasinoga ‘iā Isaraelu.
20 E le‘i fa‘apea ‘ona faia e ia i se tasi lava nu‘u;e le‘i iloa fo‘i e i latou ana fa‘amasinoga.‘Ia ‘outou vivi‘i atu i le ALI‘I.