1 Le Atua e,‘ia e fa‘aola mai ‘iā te a‘u;auā o a‘u nei, a malemo lava a‘u i le vai.
2 O le a a‘u goto i le palapala loloto,e lē o i ai se mea e tu ai;‘ua o‘o lava a‘u i mea loloto o le vai,‘ua lofia fo‘i a‘u i le vaitafe.
3 ‘Ua lailoa lava a‘u i lo‘u vala‘au;‘ua fa lo‘u leo ‘ua tigā lava o‘u mata,a o fa‘atalitali atu a‘u i lo‘u Atua.
4 O ē ‘ua ‘ino‘ino fua mai ‘iā te a‘u,e to‘atele i latou i ‘ou lauulu;e malolosi lava o ē fia fasiotia mai a‘u,o ē ita fua mai ‘iā te a‘u;o mea na ‘ou le faoa ‘ua ‘ou toe avatua lava.
5 Le Atua e,o oe lava ‘ua e silafia mai lo‘u valea;e lē lilo fo‘i a‘u agasala ‘iā te oe.
6 Le Ali‘i e, le ATUA o ‘au,‘aua ne‘i fa‘amāina ‘ona o a‘u o ē fa‘atalitali atu ‘iā te oe.Le Atua o Isaraelu e,‘aua ne‘i māsiasi ‘ona o a‘u o ē sā‘ili‘ili ‘iā te oe.
7 Auā ‘ua fa‘alumaina lava a‘u ‘ona o oe;‘ua ufitia o‘u mata i le mā.
8 ‘Ua fai a‘u ma tagata āumau i o‘u uso,ma tagata ‘ese i le fānau a lo‘u tinā.
9 Auā ‘ua ‘aina lava a‘u i le mana‘o tele i lou fale;‘ua o‘o mai fo‘i ‘iā te a‘u fāifāiga a ē na fāifaia oe.
10 ‘Ua ‘ou tagi ma ‘ou anapogi,‘ua fai lea ma luma ‘iā te a‘u.
11 Na ‘ou ‘ofu i le ‘ie talatala;‘ona faia lea o a‘u ma ‘upu fa‘atusa a i latou.
12 ‘Ua ‘upuia a‘u e i latou o ē nonofo i le faitoto‘a,‘ua fai fo‘i ma pese a ē inu ‘ava.
13 A o a‘u, ‘ou te tatalo ‘iā te oe, le ALI‘I e,i ona po o le alofa.Le Atua e,‘ona o le tele o lou alofa,‘ia e tali mai ‘iā te a‘u i le fa‘amaoni o le olataga mai ‘iā te oe.
14 ‘Ia e lavea‘i mai ‘iā te a‘u a‘i le palapala,‘aua ne‘i ‘ou goto ai;‘ia lavea‘iina a‘u i ē ‘ua ‘ino‘ino mai ‘iā te a‘u,‘atoa ma vai loloto.
15 ‘Aua ne‘i lofia a‘u i le vaitafe,‘aua fo‘i ne‘i tofatumoanaina a‘u i le mea loloto,‘aua fo‘i ne‘i punitia le gutu o le lua i luga o a‘u.
16 Le ALI‘I e, ‘ia e tali mai ‘iā te a‘u,auā e lelei lou alofa mai;‘ia e liuliu alo mai ‘iā te a‘u,e pei ‘ona tele o lou alofa mutimutivale.
17 ‘Aua ne‘i ‘alo ou fofoga i lau ‘au‘auna;auā ‘ua ‘ou puapuagātia;‘ia vave ‘ona e tali mai ‘iā te a‘u.
18 ‘Ia e fa‘alatalata mai i lo‘u agaga e fa‘aola mai ai;‘ia e lavea‘i mai ‘iā te a‘u auā o ē ita mai ‘iā te a‘u.
19 O oe, ‘ua e silafia le fa‘alumaina o a‘u,ma le fa‘amāina o a‘u ma lo‘u fa‘amasiasiga;‘ua i ou luma o i latou uma o ē ita mai ‘iā te a‘u.
20 O le luma ‘ua momomo ai lo‘u loto,‘ua ma‘i lava a‘u.‘Ua ‘ou fa‘atalitali fo‘i i sē na te fa‘amatalaloto mai,‘ae leai lava se tasi,ma ni e fa‘amafanafana mai,‘ae leai se isi na ‘ou maua.
21 Na latou avane le mea ‘o‘ona e fai ma a‘u mea e ‘ai;‘ua ‘ou fia inu, ‘ona latou avane ai lea o le vineka ‘ou te inu ai.
22 O latou la‘o‘ai ‘iā latou luma,‘ia ‘avea lea ma matāsele;o latou filemū fo‘i, ‘ia fai ma mailei.
23 ‘Ia fa‘apouliuligia lava a latou mata, ‘ia latou lē mava‘ava‘ai ai;‘iā tetemū o latou sulugātiti e lē aunoa.
24 ‘Ia sasa‘aina atu lou to‘asā ‘iā i latou;‘ia o‘o atu lava ‘iā te i latou lou to‘atama‘i e matuā tele.
25 ‘Ia fa‘atafunaina le mea latou te nonofo ai;‘aua fo‘i ne‘i i ai sē nofo i o latou fale ‘ie.
26 Auā ‘ua latou tuliloa i lē na taia lava e oe;‘ua latou ta‘uta‘u atu le tigā o ē ‘ua manunu‘a ‘iā te oe.
27 ‘Ia e fa‘aopoopoina atu le agasala i la latou agasala;‘aua fo‘i ne‘i o‘o i latou i le amiotonu mai ‘iā te oe.
28 ‘Ia sōloia i latou a‘i le tusi o le ola;‘aua fo‘i ne‘i tusia i latou fa‘atasi ma ē ‘ua amiotonu.
29 O a‘u fo‘i ‘ua puapuagātia a‘u,ma ‘ua tigā lava.Le Atua e,‘ia mamalu lava a‘u i le olataga mai ‘iā te oe.
30 ‘Ou te vivi‘i atu i le suafa o le Atua i le pese;‘ou te fa‘ane‘ene‘e atu fo‘i ‘iā te ia i le vi‘iga.
31 E sili ‘ona lelei lea i le ALI‘I i le povi,o le povi ta‘anoa o i ai nifo ma atigivae.
32 E iloa ē ‘ua tigāina, ‘ona latou ‘oli‘oli ai lea;‘ona fiafia ai lea o ‘outou loto,o ‘outou ‘ua sā‘ili i le Atua.
33 Auā o lo‘o fa‘afofoga le ALI‘I i ē matitiva,e lē ‘ino‘ino fo‘i o ia i ona tagata ‘ua noanoatia.
34 ‘Ia vivi‘i atu ‘iā te ia le lagi ‘atoa ma le lalolagi;o le sami ‘atoa ma mea uma e tata‘a ai.
35 Auā o le Atua na te fa‘aolaina Siona,na te fa‘atūina fo‘i ‘a‘ai o Iuta;latou te nonofo ai, e fai fo‘i mo i latou.
36 E fai fo‘i ma tofi o le fānau a ana ‘au‘auna;o ē alolofa atu i lona suafa e mau ai i latou.