1 ‘Amu‘ia e ‘ua sao lo latou ala,o ē sāvavali i le tulafono a le ALI‘I.
2 ‘Amu‘ia i latou o ē tausi i ana tulafono,o ē sā‘ili‘ili ‘iā te ia ma le loto ‘atoa.
3 E lē faia fo‘i e i latou se mea leaga;e sāvavali i latou i ona ala.
4 O oe lava na e poloa‘i mai‘ia matuā tausiusi i au fe‘au.
5 E! fia fa‘atatauina o‘u ala,‘ina ‘ia ‘ou tausi i au tulafono.
6 ‘Ona ‘ou le mā lava lea,pe a a‘u manatu i au poloa‘iga uma.
7 ‘Ou te vivi‘i atu ‘iā te oe ma le loto fa‘amaoni,pe a a‘oa‘oina a‘u i au fa‘amasinoga tonu.
8 ‘Ou te tausi i au tulafono;‘aua lava ‘e te matuā lafoa‘i mai ‘iā te a‘u.
9 E fa‘apefea ‘ea ‘ona fa‘amamāina e le taule‘ale‘a o lona ala?‘Ona ‘ua tausi i ai e tusa ma lau afioga.
10 ‘Ua ‘ou sā‘ili ‘iā te oe ma lo‘u loto ‘atoa;‘aua ne‘i ‘ou sesē i au poloa‘iga.
11 ‘Ua ‘ou teu i lo‘u loto lau afioga,‘ina ne‘i ‘ou agasala ‘iā te oe.
12 ‘Ia fa‘afetaia oe, le ALI‘I e;‘ia e a‘oa‘o mai ‘iā te a‘u i au tulafono.
13 ‘Ua ‘ou ta‘u atu i o‘u laugutuo fa‘amasinoga uma o lou fofoga.
14 ‘Ua ‘ou fiafia lava i le ala o au tulafono,e sili i le ‘oloa uma lava.
15 ‘Ou te mafaufau lava i au fe‘au,ma ‘ou manatua lava ou ala.
16 ‘Ou te fiafia lava a‘u i au tulafono;e lē galo ‘iā te a‘u o lau afioga.
17 ‘Ia e agalelei mai i lau ‘au‘auna,‘ia ola ai a‘u ma tausi i lau afioga.
18 ‘Ia e fa‘apupula mai o‘u mata,‘ia ‘ou va‘ai lava i mea e ofo ai i lau tulafono.
19 O le tagata ‘ese a‘u nei i le lalolagi;‘aua le nanā ‘iā te a‘u o au poloa‘iga.
20 ‘Ua nutimomoia lo‘u loto,i le mana‘o tele i au fa‘amasinoga i aso uma.
21 ‘Ua e a‘oa‘i atu i ē fa‘amaualuga, o ē ‘ua fa‘afanoina,o ē sesē i au poloa‘iga.
22 ‘Ia e ‘ave ‘ese ‘iā te a‘u le luma ma le ‘inosia;auā ‘ua ‘ou ‘ana‘ana i au tulafono.
23 Sa nonofo lava ali‘i ma fai ‘upu ‘iā te a‘u;a ‘ua mafaufau lau ‘au‘auna i au tulafono.
24 O au tulafono o lo‘u lava fiafia ia,o a‘u faipule lava ia.
25 ‘Ua pipi‘i atu lo‘u ola i le efuefu;‘ia e fa‘aolaola mai ‘iā te a‘u e tusa ma lau afioga.
26 ‘Ua ‘ou ta‘u atu o‘u ala; na e tali mai fo‘i ‘iā te a‘u;‘ia e a‘oa‘o mai ‘iā te a‘u i au tulafono.
27 ‘Ia e fa‘ailoa mai ‘iā te a‘u le ala o au fe‘au;‘ona ‘ou mafaufau lea i ou vāvega.
28 ‘Ua sisina ifo o‘u loimata ‘ona o le fa‘anoanoa;‘ia e fa‘amalosia a‘u e tusa ma lau afioga.
29 ‘Ia e fa‘ate‘a ‘ese ‘iā te a‘u le ala o le pepelo;ma ia ē foa‘i mai lau tulafono ‘iā te a‘u i le alofa.
30 ‘Ua ‘ou filifili i le ala o le fa‘amaoni;‘ua ‘ou tu‘uina au fa‘amasinoga i o‘u luma.
31 ‘Ua ‘ou pipi‘i atu i au tulafono;le ALI‘I e, ‘aua ‘e te fa‘amāina a‘u.
32 ‘Ou te momo‘e i le ala o au poloa‘iga,pe a o foa‘iina mai ‘iā te a‘u le loto matala.
33 Le ALI‘I e, ‘ia e a‘oa‘o mai ‘iā te a‘u i le ala o au tulafono,‘ona ‘ou ‘ana‘ana lava lea i ai se‘ia o‘o i le gata‘aga.
34 ‘Ia e a‘oa‘o mai ‘iā te a‘u, ‘ona ‘ou ‘ana‘ana lea i lau tulafono,ma ‘ou tausia ma lo‘u loto ‘atoa.
35 ‘Ia e ta‘ita‘iina atu a‘u i le ala o au poloa‘iga;auā ‘ou te fiafia lava i ai.
36 ‘Ia e fa‘auai atu lo‘u loto i au tulafono,‘ae ‘aua ne‘i i le matape‘ape‘a.
37 ‘Ia e liliu‘eseina o‘u mata ne‘i ‘ou va‘ai i mea lē aogā;‘ia e fa‘aolaolaina a‘u i lou ala.
38 ‘Ia e fa‘atumauina lau afioga i lau ‘au‘auna,o lē ‘ua mata‘u ‘iā te oe.
39 ‘Ia e liliu‘eseina lo‘u luma ‘ou te fefe ai;auā e lelei au fa‘amasinoga.
40 Fa‘auta, ‘ua ‘ou naunau lava i au fe‘au;‘ia e fa‘aolaola mai ‘iā te a‘u i lau amiotonu.
41 ‘Ia o‘o mai fo‘i ‘iā te a‘u lou alofa, le ALI‘I e,o lau olataga, e tusa ma lau afioga.
42 ‘Ona ‘ou tali atu lea se ‘upu i lē fa‘alumaina a‘u;auā ‘ou te fa‘atuatua i lau afioga.
43 ‘Aua fo‘i ‘e te matuā ‘ave‘esea le ‘upu moni i lo‘u gutu;auā ‘ua ‘ou fa‘amoemoe i au fa‘amasinoga.
44 ‘Ona ‘ou tausi lea e lē aunoa lau tulafonoe fa‘avavau fa‘avavau lava.
45 ‘Ou te savali fo‘i i le mea lautele;auā ‘ua ‘ou sā‘ili i au fe‘au.
46 ‘Ou te tautala fo‘i i au tulafono i luma o tupu;‘ou te lē mā ai lava.
47 ‘Ou te fiafia lava a‘u i au poloa‘iga,‘ua ‘ou naunau i ai.
48 ‘Ou te si‘i fo‘i i luga o‘u lima i au poloa‘iga ‘ua ‘ou naunau i ai;‘ou te mafaufau lava i au tulafono.
49 ‘Ia e manatua lau afioga i lau ‘au‘auna,auā ‘ua e fa‘atupuina lo‘u fa‘amoemoe.
50 O le fa‘amatalaloto lea ‘iā te a‘u i lo‘u puapuagā;auā o lau afioga ‘ua fa‘aolaolaina ai a‘u.
51 ‘Ua matuā tauemu mai ‘iā te a‘u o ē fa‘amaualuga;‘ou te le‘i liliu ‘ese i lau tulafono.
52 Le ALI‘I e, ‘ua ‘ou manatu i au fa‘amasinoga talu anamua,‘ona fa‘amafanafanaina ai lea o a‘u.
53 ‘Ua maua a‘u e le tigā tele ‘ona o ē amio leaga,ē ‘ua lafoa‘iina lau tulafono.
54 O au tulafono ‘ua fai ia ma a‘u pesei le fale ‘ou te āumau ai.
55 Le ALI‘I e, ‘ua ‘ou manatu i lou suafa i le po,ma ‘ou tausi i lau tulafono.
56 ‘Ua ‘iā te a‘u lenā mea,auā ‘ua ‘ou ‘ana‘ana au fe‘au.
57 Le ALI‘I e, o lo‘u tofi lava oe,‘ua ‘ou fai atu: ‘Ou te tausi i au afioga.
58 ‘Ua ‘ou fa‘atoga atu i ou luma ma lo‘u loto ‘atoa;‘ia e alofa mai ‘iā te a‘u e tusa ma lau afioga.
59 Na ‘ou mānatunatu i o‘u ala,‘ona liliu atu lava lea o‘u vae i au tulafono.
60 ‘Ua ‘ou fa‘atelevave, ‘ou te le‘i fa‘atelegese‘ona tausi i au poloa‘iga.
61 ‘Ua si‘omia a‘u i mailei a ē amio leaga;‘ua lē galo ‘iā te a‘u o lau tulafono.
62 ‘Ou te ala i le tulua o po e vivi‘i atu ai ‘iā te oe,‘ona o au fa‘amasinoga tonu.
63 ‘Ua matou uō ma i latou uma o ē matata‘u ‘iā te oe,ma ē ‘ua tausi i au fe‘au.
64 Le ALI‘I e, ‘ua tumu le lalolagi i lou alofa;‘ia e a‘oa‘o mai ‘iā te a‘u i au tulafono.
65 Le ALI‘I e, ‘ua e agalelei mai i lau ‘au‘auna,e tusa ma lau afioga.
66 ‘Ia e a‘oa‘o mai ‘iā te a‘u i le fa‘autauta lelei ma le poto;auā ‘ua ‘ou fa‘amaoni i au poloa‘iga.
67 A o le‘i puapuagātia a‘u na ‘ou sesē;a o lenei, ‘ua e tausi i lau afioga.
68 E lelei oe, ‘ua e agalelei fo‘i;‘ia e a‘oa‘o mai ‘iā te a‘u i au tulafono.
69 ‘Ua fatu fua ē ‘ua fa‘amaualuga le tala pepelo ‘iā te a‘u;o a‘u, ‘ou te ‘ana‘ana i au fe‘au ma lo‘u loto ‘atoa.
70 ‘Ua lololo o latou loto e pei o le ga‘o;o a‘u, ‘ou te ‘oli‘oli lava i lau tulafono.
71 O le mea e lelei ai a‘u ‘ina ‘ua puapuagātia a‘u,‘ina ‘ia a‘oa‘oina ai a‘u i au tulafono.
72 E sili ‘ona lelei ‘iā te a‘u o le tulafono a lou fofogai afe o auro ma ario.
73 Na faia a‘u e ou ‘a‘ao, ‘ua saunia ai fo‘i a‘u;‘ia e fa‘alotomatala mai ‘iā te a‘u,‘ina ‘ia a‘oa‘oina lava a‘u i au poloa‘iga.
74 O ē matata‘u ‘iā te oe latou te iloa mai a‘u, ‘ona fiafia lea o i latou;auā ‘ua ‘ou fa‘amoemoe i lau afioga.
75 Le ALI‘I e, ‘ua ‘ou iloa e tonu lava au fa‘amasinoga,na e fa‘apuapuagātia fo‘i a‘u i le fa‘amaoni.
76 ‘Ia fai lou alofa ma fa‘amatalaloto ‘iā te a‘u,e tusa ma lau afioga i lau ‘au‘auna.
77 ‘Ia o‘o mai ‘iā te a‘u ou alofa mutimutivale, ‘ia ‘ou ola ai;auā o lau tulafono, o lo‘u fiafia lea.
78 ‘Ia māsiasi o ē fa‘amaualuga,auā ‘ua latou fa‘api‘opi‘o fua mai ‘iā te a‘u;o a‘u, ‘ou te mafaufau i au fe‘au.
79 ‘Ia fa‘asaga mai ‘iā te a‘u o ē matata‘u ‘iā te oe,‘atoa ma ē ‘ua iloa au tulafono.
80 ‘Ia sao lava lo‘u loto i au tulafono,‘ina ‘ia ‘ou lē mā lava.
81 ‘Ua lailoa lava a‘u i le mana‘o i le olataga mai ‘iā te oe;‘ou te fa‘amoemoe fo‘i i lau afioga.
82 O le a ‘avea o‘u mata, i le va‘ai atu i lau afioga,o lo‘o ‘ou fa‘apea atu, “‘E te fa‘amafanafana mai ‘ea afea ‘iā te a‘u?”
83 E ui ‘ina ‘avea a‘u pei o se fagu pa‘u i le asu,‘ua lē galo ‘iā te a‘u au tulafono.
84 E fia ‘ea aso o lau ‘au‘auna?‘E te faia ‘ea afea le fa‘amasinoga i ē sauā mai ‘iā te a‘u?
85 O ē fa‘amaualuga, ‘ua latou ‘elia lua mo a‘u,‘ua lē tusa lea ma lau tulafono.
86 O au poloa‘iga uma e fa‘amaoni lava ia;e sauā fua mai i latou ‘iā te a‘u;‘ia e fesoasoani mai ‘iā te a‘u.
87 ‘Ua toe ‘ina latou fa‘aumatia a‘u i le nu‘ua o a‘u, ‘ou te lē lafoa‘iina au fe‘au.
88 ‘Ia e fa‘aolaola mai ‘iā te a‘u e tusa ma lou alofa,‘ona ‘ou tausi lava lea i le tulafono a lou fofoga.
89 Le ALI‘I e,‘ua mausalī lau afioga i le lagi e fa‘avavau lava.
90 E au tupulaga lou fa‘amaoni;na e fa‘atumauina le lalolagi, ‘ona tumau lea.
91 O lau pule o lo‘o tumau ai ia mea i le aso nei;auā o au ‘au‘auna, ‘ia mea uma lava.
92 ‘Ana le ‘avea lau tulafono mo‘u fiafia,po ‘ua ‘ou fano i lo‘u puapuagā.
93 E lē galo ‘iā te a‘u au fe‘au e fa‘avavau;auā o mea ia na e fa‘aolaola mai ai ‘iā te a‘u.
94 O ‘iā te oe a‘u nei, ‘ia e fa‘aola mai ‘iā te a‘u;auā ‘ua ‘ou sā‘ili i au fe‘au.
95 ‘Ua lamalama o ē amio leaga latou te fasioti ‘iā te a‘u;‘ua ‘ou mafaufau i au tulafono.
96 ‘Ua ‘ou va‘aia le i‘uga o mea uma ‘ua ‘ato‘atoa ‘ona lelei;o lau poloa‘iga e matuā lautele lea.
97 ‘Ua tele lava lo‘u naunau i lau tulafono;‘ou te mafaufau i ai i le aso ‘atoa.
98 O au poloa‘iga e sili ai ‘ona poto o a‘u i ē ita mai ‘iā te a‘u;auā e ‘iā te a‘u lava ia e fa‘avavau.
99 ‘Ua sili ‘ona atamai o a‘u i ē a‘oa‘o mai ‘iā te a‘u uma lava;auā o au tulafono ‘ou te mafaufau i ai.
100 O lo‘u lotomatala ‘ua sili i ē toeaina,auā ‘ua ‘ou ‘ana‘ana i au fe‘au.
101 ‘Ua ‘alo ‘ese o‘u vae i ala leaga uma lava,‘ina ‘ia ‘ou tausi i lau afioga.
102 ‘Ou te le‘i alu ‘ese i au fa‘amasinoga,auā ‘ua e a‘oa‘o mai oe ‘iā te a‘u.
103 ‘Ua matuā suamalie au afioga i lo‘u gutu,‘ua sili i lo le meli i lo‘u gutu.
104 O au fe‘au ‘ou te maua ai le lotomatalao le mea lea ‘ou te ‘ino‘ino ai i ala pepelo uma lava.
105 O lau afioga o le sulu lea i o‘u vae,ma le malamalama i lo‘u ala.
106 Na ‘ou tautō, ‘ou te fa‘amaoni fo‘i,‘ou te tausi i au fa‘amasinoga tonu.
107 ‘Ua matuā puapuagātia a‘u; le ALI‘I e,‘ia e fa‘aolaola mai ‘iā te a‘u e tusa ma lau afioga.
108 Le ALI‘I e, ‘ia e talia mai lava o taulaga e faia ma le lotona fai atu ai lo‘u gutu;ma a‘oa‘o mai ‘iā te a‘u i au fa‘amasinoga.
109 O i lo‘u lima lo‘u nei ola e lē aunoa;‘ae lē galo ‘iā te a‘u lau tulafono.
110 O ē amio leaga ‘ua latou faia le mailei mo a‘u‘ae le‘i sesē a‘u i au fe‘au.
111 ‘Ua fai mo‘u tofi o au tulafono e fa‘avavau;auā o mea ia e fa‘afiafia a‘i lo‘u loto.
112 ‘Ua ua‘i atu lo‘u loto e fai au tulafonoe fa‘avavau fa‘avavau lava.
113 ‘Ou te ‘ino‘ino i ē loto fetōa‘i,a ‘ou te naunau i lau tulafono.
114 O lo‘u lafitaga, oe ma lo‘u talitā;‘ou te fa‘amoemoe i lau afioga.
115 Ō ‘ese ia ‘iā te a‘u, ‘outou o ē amio leaga;auā ‘ou te ‘ana‘ana lava poloa‘iga a lo‘u Atua.
116 ‘ia e lagolagoina mai a‘u e tusa ma lau afioga,‘ina ‘ia ‘ou ola ‘aua fo‘i ne‘i ‘ou mā i lo‘u fa‘amoemoega.
117 ‘ia e lagolagoina o a‘u, ‘ona fa‘aolaina lea o a‘u;‘ona ‘ou fa‘asaga lea e lē aunoa i au tulafono.
118 ‘Ua e fa‘alēaogāina i latou uma o ē sesē i au tulafono;auā o le pepelo lo latou fa‘a‘ole‘ole.
119 ‘Ua e ‘ave‘eseina o ē amio leaga uma o i le nu‘u pei o le otaota o ario;o le mea lea ‘ou te naunau ai i au tulafono.
120 ‘Ua gatete lo‘u tino i le mata‘u ‘iā te oe;ma ‘ou fefe i au fa‘amasinoga.
121 ‘Ua ‘ou faia le fa‘amasinoga ma le amiotonu;‘aua ‘e te tu‘uina atu a‘u i ē sauā mai ‘iā te a‘u.
122 ‘Ia fai oe ma fesoasoani i lau ‘au‘auna, ‘ou te lelei ai;‘aua ne‘i sauā mai ‘iā te a‘u o ē fa‘amaualuga.
123 ‘Ua ‘avea o‘u mata i le mana‘o i lau olataga,ma lau afioga tonu.
124 ‘ia e faia i lau ‘au‘auna e tusa ma lou alofa,ma a‘oa‘o mai ‘iā te a‘u i au tulafono.
125 O lau ‘au‘auna a‘u nei, ‘ia e fa‘alotomatala mai ‘iā te a‘u,‘ina ‘ia ‘ou iloa au tulafono.
126 ‘Ua o‘o mai ona po e galue ai le ALI‘I;‘ua solia e i latou lau tulafono.
127 O le mea lea ‘ua sili ai lo‘u mana‘o i au poloa‘igai le auro, o le auro lelei lava.
128 O le mea lea ‘ou te manatu ai ‘ua tonu au fe‘au ‘atoa uma lava‘ou te ‘ino‘ino i ala pepelo uma lava.
129 O mea e ofo ai au tulafono,o le mea lea e ‘ana‘ana i ai lo‘u loto.
130 O le fa‘aalia mai o au afioga e fa‘amalamalamaina ai;e fa‘alotomatalaina ai ē ‘ua faigofie.
131 ‘Ua fa‘amaga lo‘u gutu ma ‘ou ga‘ega‘e;auā ‘ua ‘ou naunau atu i au poloa‘iga.
132 ‘Ia e liuliu alo mai ‘iā te a‘u ma alofa fua mai ‘iā te a‘u,e pei ‘ona e masani ai i ē alolofa i lou suafa.
133 ‘Ia e fa‘amautūina lo‘u savali i lau afioga;‘aua fo‘i ne‘i manumālō mai se amio leaga e tasi ‘iā te a‘u.
134 Lavea‘i mai ‘iā te a‘u i le sauāga a tagata;‘ona ‘ou tausi lea i au fe‘au.
135 ‘Ia fa‘amalamalama mai ou fofoga i lau ‘au‘aunama a‘oa‘o mai ‘iā te a‘u i au tulafono.
136 O lo‘o tafe ifo o vaitafe i o‘u mata,auā e lē tausi e i latou lau tulafono.
137 E amiotonu lava oe, le ALI‘I e,‘ua tonu fo‘i au fa‘amasinoga.
138 ‘Ua e poloa‘i mai i au tulafono ‘ua tonu,ma le fa‘amaoni lava.
139 ‘Ua fa‘aumatia a‘u i lo‘u mā‘elegā,‘ina ‘ua galo i ē sauā mai ‘iā te a‘u au afioga.
140 ‘Ua se ario ‘ua te‘a ma le otaota lau afioga;e naunau fo‘i i ai lau ‘au‘auna.
141 E fa‘atauva‘a lava a‘u ma ‘inosia;‘ae lē galo ‘iā te a‘u au fe‘au.
142 O lau amiotonu o le amiotonu e fa‘avavau lea;o le mea moni fo‘i lau tulafono.
143 ‘Ua maua a‘u e le puapuagā ma le tigā;o au poloa‘iga ‘ou te fiafia i ai.
144 O au tulafono o mea tonu ia e fa‘avavau;‘ia e fa‘alotomatala mai ‘iā te a‘u, ‘ou te ola ai.
145 ‘Ua ‘ou vala‘au ‘iā te oe ma le loto ‘atoa;le ALI‘I e,‘ia e tali mai ‘iā te a‘u; ‘ou te ‘ana‘ana lava i au tulafono.
146 ‘Ua ‘ou vala‘au ‘iā te oe; ‘ia e fa‘aola mai ‘iā te a‘u,‘ona ‘ou tausi lea i au tulafono.
147 ‘Ua muamua i le tafa o ata ‘ona ‘ou ‘alaga atu‘ua ‘ou fa‘amoemoe i lau afioga.
148 ‘Ua muamua ‘ona pupula o‘u mata i leoleoga i itū po,‘ina ‘ia ‘ou mafaufau i lau afioga.
149 ‘Ia e fa‘afofoga mai i lo‘u leo e tusa ma lou alofa;le ALI‘I e, ‘ia e fa‘aolaola mai ‘iā te a‘u e tusa ma lau fa‘amasinoga.
150 O lo‘o fa‘alatalata mai ē ‘ua tausisi i amio leaga;e vāvā mamao i latou ma lau tulafono.
151 ‘Ua latalata mai oe le ALI‘I e;o au poloa‘iga uma fo‘i e moni lava ia.
152 Talu anamuā ‘ua ‘ou iloa ai au tulafono,‘ua e fa‘avaeina ia e fa‘avavau.
153 Silasila mai ia i lo‘u tigā ma ‘ia e lavea‘i mai ‘iā te a‘u;auā e lē galo ‘iā te a‘u lau tulafono.
154 ‘Ia e faia la‘u finauga ma lavea‘i mai ‘iā te a‘u;‘ia e fa‘aolaola mai ‘iā te a‘u e tusa ma lau afioga.
155 E vāvā mamao le fa‘aolataga ma i latou o ē amio leaga;auā e lē sā‘ili i latou i au tulafono.
156 Le ALI‘I e, ‘ua tele lou alofa mutimutivale;‘ia e fa‘aolaola mai ‘iā te a‘u e tusa ma au fa‘amasinoga.
157 E to‘atele o ē sauā mai ma ita mai ‘iā te a‘u;‘ou te lē liliu ‘ese lava i au tulafono.
158 Na ‘ou iloa atu i ē ‘ua fa‘a‘ole‘ole ma ‘ou ‘ino‘ino i ai,o i latou o ē lē tausi i lau afioga.
159 ‘ia e silasila mai ‘ua ‘ou naunau i au fe‘au;le ALI‘I e, ‘ia e fa‘aolaola mai ‘iā te a‘u e tusa ma lou alofa.
160 E moni lava lau afioga talu le amataga;e fa‘avavau fo‘i au fa‘amasinoga tonu uma lava.
161 ‘Ua sauā fua mai ali‘i ‘iā te a‘u;a ‘ua fefe lo‘u loto i au afioga.
162 ‘Ou te fiafia a‘u i lau afioga,fa‘apei o lē ‘ua maua le vete tele.
163 ‘Ou te ‘ino‘ino i le tala pepelo, ‘ou te matuā ‘ino‘ino i ai;a ‘ou te naunau i lau tulafono.
164 E ta‘i fo‘i fa‘afitu i aso ‘ona ‘ou vivi‘i atu ‘iā te oe,‘ona o au fa‘amasinoga tonu.
165 ‘Ua tele le filemū o ē naunau i lau tulafono;e leai fo‘i se mea e tausuai ai i latou.
166 Le ALI‘I e, ‘ua ‘ou fa‘amoemoe i lau olataga,ma a‘u faia au poloa‘iga.
167 ‘Ua tausi au tulafono i lo‘u loto;ma ‘ou matuā naunau i ai.
168 ‘Ua ‘ou tausi i au fe‘au, ‘atoa ma au tulafono;auā o i ou luma o‘u ala uma lava.
169 Le ALI‘I e, ‘ia o‘o atu lau ‘alaga i ou luma;‘ia e fa‘alotomatala mai ‘iā te a‘u, e tusa ma lau afioga.
170 ‘Ia o‘o atu i ou luma la‘u ‘ai‘oi atu;‘ia e lavea‘i mai ‘iā te a‘u, e tusa ma lau afioga.
171 E ta‘u atu le vi‘iga i o‘u laugutu,pe a e a‘oa‘o mai ‘iā te a‘u i au tulafono.
172 E tautala lo‘u laulaufaiva i lau afioga,auā ‘ua tonu au poloa‘iga uma lava.
173 ‘Ia fesoasoani mai lou ‘a‘ao ‘iā te a‘u;auā ‘ua ‘ou filifilia au fe‘au.
174 Le ALI‘I e, ‘ou te naunau i lau fa‘aolataga;o lau tulafono fo‘i, o lo‘u lea fiafia.
175 ‘Ia ola lava a‘u, ‘ina ‘ia ‘ou vivi‘i atu ‘iā te oe;‘ia fesoasoani mai fo‘i au fa‘amasinoga ‘iā te a‘u.
176 ‘Ua ‘ou alu ‘ese fa‘apei o le mamoe ‘ua sē;‘ia e sā‘ili mai i lau ‘au‘auna;auā ‘ua lē galo ‘iā te a‘u au poloa‘iga.