1 ‘Ia tula‘i mai le Atua, ‘ia fa‘ata‘ape‘apeina ē ‘ua ita ‘iā te ia;‘ia sōsōla ‘ese fo‘i i ona luma o ē ‘ua ‘ino‘ino ‘iā te ia.
2 E pei ‘ona lelea o le asu,‘ia fa‘apea ‘ona e fa‘aleleaina i latou;e pei ‘ona liu suāvai o le pulu i le afi,‘ia fa‘apea ‘ona fano i luma o le Atua o ē amio leaga.
3 A ‘ia fiafia o ē amiotonu;‘ia latou ‘oli‘oli lava i luma o le Atua;‘ia matuā fiafia lava i latou.
4 ‘Ia ‘outou pepese atu i le Atua,‘ia fai pesega i lona suafa;‘ia ‘outou fa‘alaulelei le ala mo lē ti‘eti‘e ma afio atu i le vao;o le ALI‘I o lona suafa lea ma ‘ia ‘outou ‘oli‘oli i ona luma.
5 O le Tamā ia o ē ‘ua mātuaoti,le na te fa‘amasinoina mo fafine ‘ua oti a latou tane,o le Atua lea o lo‘o i lona afio‘aga pa‘ia.
6 O le Atua na te fa‘atagatāina ē ‘ua ausage;na te ‘aumaia ē ‘ua noanoatia i le mea e manuia ai;a o ē fouvale, latou te nonofo i le nu‘u naumati.
7 Le Atua e, na e muamua atu i lou nu‘u,na e afio atu i le vao. Selā.
8 ‘Ona gatete ai lea o le lalolagi,o le lagi fo‘i na tautulu ifo i luma o le Atua.O Sinai lava na gatete ia i luma o le Atua, o le Atua o Isaraelu.
9 Le Atua e, na e fa‘atotōina ifo le ‘ua tele,o lou tofi sa lailoa, o oe lava na e fa‘amalosia.
10 Sa nofo i ai lau fa‘apotopotoga;le Atua e,o lou alofa na e sauni ai mo lē ‘ua puapuagātia.
11 Na tulei mai le afioga a le Ali‘i;e tele ‘au o ē na tala‘iina.
12 “Na sōsōla tupu o ‘au, na latou sōsōla lava.”O le fafine fo‘i na fa‘amuli na ia tufatufaina le vete.
13 E ui lava ‘ina ta‘o‘oto ‘outou i le vā o ‘ulo,e ‘avea ‘outou e pei o ‘apa‘au o le lupe e liloia i ario,ma ona fulu e liloia i le auro samasama.
14 Na fa‘ata‘ape‘apeina ai tupu e Lē e ona le malosi uma lava,‘ona sinasina ai lea e pei o le kiona i Salemoni.
15 O le mauga o Vasana, o le mauga o le Atua lea;o le mauga o Vasana, o le atu mauga lava lea.
16 Le atu mauga e,se a le mea tou te lamalama mai ai?O le mauga nei ‘ua finagalo le Atua e afio ai;e mau ai lava le ALI‘I e fa‘avavau.
17 O kariota o le Atua e lua sefulu o afe,e manomānō lava;o lo‘o ‘iā te i latou le Ali‘i,e pei ‘ona i ai Sinai i le mea pa‘ia.
18 Na e afio a‘e i le mea maualuga,na e ta‘ita‘i fa‘atagataotau‘a i le tāfeaga;na e maua mea alofa mo tagata,o ē fouvale lava, ‘ina ‘ia nofo ai le ALI‘I le Atua.
19 ‘Ia fa‘afetaia le Ali‘i, i lea aso ma lea aso;‘ua ‘ia ‘ave o tatou avega,o le Atua o lo tatou olataga ia. Selā.
20 O lo tatou Atua, o le Atua o le olataga lea,o le ATUA o le Ali‘i e ana e fa‘asaoina i le oti.
21 E moni, o le Atua na te foa‘iina ulu o ē ita ‘iā te ia,o le tumua‘i lauulua o lē ‘ua finau i ana agasala.
22 ‘Ua fetalai mai le Ali‘i,“‘Ou te fa‘afoisia mai mai Vasana,‘ou te fa‘afoisia mai mai le loloto o le sami;
23 ‘ina ‘ia feseua‘i lou vae i le toto;‘ia etoeto fo‘i laulaufaiva o āu ulī le totoo ē ita ‘iā te oe ta‘itasi uma lava.”
24 Le Atua e, na latou iloa lou afio atu;o lē afio atu o lo‘u Atua,ma lo‘u Tupu i le malumalu.
25 ‘Ua muamua o ē pepese,‘ua mulimuli o ē ta la‘aupese;‘ua i le vā taupou ta topa.
26 “‘Ia fa‘afetaia le Atua i fa‘apotopotoga,o le Ali‘i lava, ‘outou na ‘ua puna mai ‘iā Isaraelu.”
27 O i ai Peniamina le ui‘i, o le pule ‘iā i latou;o ali‘i o Iuta ma o latou faipule;o ali‘i o Sepulona, ‘atoa ma ali‘i o Nafatali.
28 ‘Ua pule mai e lou Atua lou malosi;le Atua e, ‘ia malosi oe i le mea ‘ua e faia mo i matou.
29 O tupu latou te avatu mea alofa ‘iā te oe,‘ona o lou malumalu i Ierusalema.
30 ‘Ia e a‘oa‘i i manu fe‘ai o i mea ‘ua,‘atoa ma le vao povi malolosi ma tama‘i povi a le nu‘u,se‘ia ifo mai ia ma fāsi ario;‘ia e fa‘ata‘ape‘apeina le nu‘u ‘ua naunau i tau‘a.
31 E ō mai ali‘i sili mai Aikupito;e vave ‘ona fa‘aloaloa atu e Aitiope ona lima i le Atua.
32 O ‘outou mālō o le lalolagi ‘inā pepese atu ia i le Atua;‘ia ‘outou fai pesega i le Ali‘i; Selā.
33 O lē ti‘eti‘e atu i lagi o lagi o le vavau;fa‘auta, ‘ua ia tulei mai lona si‘ufofoga o le si‘ufofoga malosi.
34 ‘Ia ‘outou tu‘u atu le malosi i le Atua;o lo‘o i luga o Isaraelu lona silisili ‘ese,o lo‘o i ao fo‘i lona malosi.
35 Le Atua e,‘ua mata‘utia oe a‘i ou afio‘aga pa‘ia;o le Atua o Isaraelu,o ia lea na te tu‘uina atu le malosi ma le fitafita i lona nu‘u.‘Ia fa‘afetaia lava le Atua.