1 In U, o יהוה, plaas ek my vertroue; laat my nooit beskaamd staan nie!
2 Bevry my deur U onpartydige opregtheid en red my; draai U oor na my en verlos my!
3 Wees U vir my ’n rots van skuiling waarheen ek voortdurend kan gaan; gee U die bevele om my te red, want U is my Rots en my Vesting.
4 Bevry my, o God, uit die hand van die bose persoon, uit die hand van hom wat moreel verdraaid en ’n wrede man is,
5 want U is my Versekerde Verwagting, יהוה-God, van my jeug af is U my Vertroue.
6 Ek is deur U ondersteun vanaf die baarmoeder af, U is my Versekerde Verwagting sedert ek in die liggaam van my moeder was; my lofprysing is voortdurend tot U.
7 Ek is vir baie soos ’n wonder, maar U is my kragtige Skuiling.
8 My mond is die hele dag lank vol van lofprysing en U eer.
9 Verwerp my nie in die tyd van hoë ouderdom nie, laat my nie in die steek wanneer my krag faal nie,
10 want my vyande praat teen my en die wat lê en wag op my lewe hou saam beraad
11 en sê: “God het hom in die steek gelaat; agtervolg en gryp hom, want daar is niemand om hom te bevry nie!”
12 O God, wees nie ver van my af nie; o my God, maak gou met my hulp!
13 Laat hulle wat jaloers is op my lewe, beskaamd en in verleentheid wees; laat hulle wat my ongeluk soek in skande bedek wees,
14 maar ék sal voortdurend bid en U meer en meer lofprys.
15 My mond sal U onpartydige opregtheid en verlossing die hele dag lank verkondig, want ek ken nie die grootheid daarvan nie.
16 Ek sal gaan in die krag van יהוה; ek sal U onpartydige opregtheid alleen vermeld.
17 O God, U het my van kleins af geleer sodat ek U wonderwerkende dade kan verkondig.
18 Nou ook op hoë ouderdom en grys hare, o God, verlaat my nie totdat ek aan die volgende geslag U krag en U sterkte gewys het.
19 U onpartydige opregtheid, o God, het gereik tot in die hoogte; U het groot dinge gedoen, o God, wie is soos U?
20 U wat my groot en moeilike probleme gewys het, U sal my weer opwek en my laat opkom uit die dieptes van die aarde.
21 U het my grootheid vermeerder en teruggekom om my te troos.
22 Ek sal U ook loof en prys met uitgestrekte hande en instrumente; ek sal tot U waarheid sing, o my God; ek sal tot U sing met die harp, o Afgesonderde Een van Yisra’el!
23 My lippe en my lewe, wat U losgekoop het, sal dit uitskree van vreugde wanneer ek tot U sing.
24 My tong sal ook praat van U onpartydige opregtheid, die hele dag lank, want hulle is verward, hulle wat my ongeluk soek word tot skande gemaak.