7 Тешко ме притиска Твојот гнев, и со сите Свои бранови ме прекриваш.
8 Ги оддалечи од мене моите познати, направи да им бидам гнасен: затворен сум, не можам да излезам.
9 Очите ми гаснат од тага: викам кон Тебе, Господи, секој ден, кон Тебе ја пружам раката.
10 Зар над мртвите ќе правиш чудеса? Зар сенките ќе станат и ќе Те фалат?
11 Зар во гробот се раскажува за Твојата милост? За Твојата вистина во Гибелта?
12 Зар во темнина се објавуваат Твоите чудеса и Твојата правда во Заборавот?
13 Сепак, јас викам кон Тебе, Господи, пред мугрите, со молитва Те претекнувам.