1 Haleluya.Ndidzayamika Yehova ndi mtima wonse,Mu upo wa oongoka mtima, ndi mumsonkhano.
2 Nchito za Yehova nzazikuru,Zofunika ndi onse akukondwera nazo.
3 Cocita Iye nca ulemu, ndi ukuru:Ndi cilungamo cace cikhalitsa kosatha.
4 Anacita cokumbukitsa zodabwiza zace;Yehova ndiye wa cisomo ndi nsoni zokoma.
5 Anapatsa akumuopa Iye cakudya;Adzakumbukila cipangano cace kosatha.
6 Anaonetsera anthu ace mphamvu ya nchito zace,Pakuwapatsa colowa ca amitundu.
7 Nchito za manja ace ndizo caonadi ndi ciweruzo;Malangizo ace onse ndiwo okhulupirika.
8 Acirikizika ku nthawi za nthawi,Acitika m'coonadi ndi cilunjiko,
9 Anatumizira anthu ace cipulumutso;Analamulira cipangano cace kosatha;Dzina lace ndilo loyera ndi loopedwa.
10 Kumuopa Yehova ndiko ciyambi ca nzeru;Onse akucita cotero ali naco cidziwitso cokoma;Cilemekezo cace cikhalitsa kosatha.