1 Haleluya;Lemekezani dzina la Yehova;Lemekezani inu atumiki a Yehova:
2 Inu akuimirira m'nyumba ya Yehova,M'mabwalo a nyumba ya Mulungu wathu.
3 Lemekezani Yehova; pakuti Yehova ndiye wabwino;Muyimbire zolemekeza dzina lace; pakuti nkokondweretsa kutero.
4 Pakuti Yehova anadzisankhira Yakobo,Israyeli, akhale cuma cace ceni ceni.
5 Pakuti ndidziwa kuti Yehova ndi wamkuru,Ndi Ambuye wathu aposa milungu yonse.
6 Ciri conse cimkonda Yehova acicita,Kumwamba ndi pa dziko lapansi, m'nyanja ndi mozama monse.
7 Akweza mitambo icokere ku malekezero a dziko lapansi;Ang'animitsa mphezi zidzetse mvula;Aturutsa mphepo mosungira mwace.
8 Anapanda oyamba a Aigupto,Kuyambira munthu kufikira zoweta.
9 Anatumiza zizindikilo ndi zodabwiza pakati pako,Aigupto iwe, Pa Farao ndi pa omtumikira onse.
10 Ndiye amene anapanda amitundu ambiri.Napha mafumu amphamvu;
11 Sihoni mfumu ya Aamori,Ndi Ogi mfumu ya Basana,Ndi maufumu onse a Kanani:
12 Ndipo anapereka dziko lao likhale cosiyira,Cosiyira ca kwa Israyeli anthu ace.
13 Dzina lanu, Yehova, likhala kosatha;Cikumbukilo canu, Yehova, kufikira mibadwo mibadwo.
14 Pakuti Yehova adzaweruza anthu ace,Koma adzaleka atumiki ace.
15 Mafano a amitundu ndiwo siliva ndi golidi,Nchito ya manja a anthu.
16 Pakamwa ali napo koma osalankhula;Maso ali nao, koma osapenya;
17 Makutu ali nao, koma osamva;Inde, pakamwa pao palibe mpweya.
18 Akuwapanga adzafanana nao;Inde, onse akuwakhulupirira.
19 A nyumba ya Israyeli inu, lemekezani Yehova:A nyumba ya Aroni inu, lemekezani Yehova:
20 A nyumba ya Levi inu, lemekezani Yehova:Inu akuopa Yehova, lemekezani Yehova.
21 Alemekezedwe Yehova kucokera m'Ziyoni,Amene akhala m'Yerusalemu.Haleluya,