1 ឱព្រះនៃទូលបង្គំ ព្រះនៃទូលបង្គំអើយហេតុអ្វីបានជាទ្រង់លះចោលទូលបង្គំហើយគង់ឆ្ងាយឥតជួយទូលបង្គំ ឬស្តាប់សេចក្ដីដំងូររបស់ទូលបង្គំដូច្នេះ
2 ឱព្រះនៃទូលបង្គំអើយ ទូលបង្គំអំពាវនាវនៅពេលថ្ងៃតែទ្រង់មិនមានព្រះបន្ទូលឆ្លើយមកសោះក៏ស្រែកនៅពេលយប់ផង តែទូលបង្គំមិនចេះស្រាកស្បើយឡើយ
3 ប៉ុន្តែ ឱព្រះដែលបានតាំងឡើង ក្នុងទំនុកសរសើររបស់អ៊ីស្រាអែលអើយ ទ្រង់បរិសុទ្ធ
4 ពួកអយ្យកោយើងខ្ញុំបានទុកចិត្តនឹងទ្រង់គេបានទុកចិត្ត ហើយទ្រង់បានប្រោសឲ្យរួច