10 ព្រះដែលវាយប្រដៅដល់អស់ទាំងសាសន៍តើទ្រង់មិនផ្ចាលឯងទេឬអីគឺព្រះនោះឯង ដែលបង្រៀនឲ្យមនុស្សមានចំណេះ
11 ព្រះយេហូវ៉ាទ្រង់ជ្រាបអស់ទាំងគំនិតរបស់មនុស្សថាសុទ្ធតែឥតប្រយោជន៍ទទេ
12 ឱព្រះយេហូវ៉ាអើយ មានពរហើយ មនុស្សណាដែលទ្រង់វាយផ្ចាលហើយបង្ហាត់បង្រៀនតាមក្រឹត្យវិន័យទ្រង់ផង
13 គឺដើម្បីឲ្យទ្រង់បានប្រោស ឲ្យអ្នកនោះមានសេចក្ដីសំរាកនៅថ្ងៃអាក្រក់ទំរាំតែគេជីករណ្តៅសំរាប់មនុស្សប្រព្រឹត្តទំនាស់
14 ដ្បិតព្រះយេហូវ៉ាទ្រង់នឹងមិនចោលរាស្ត្រទ្រង់ឡើយក៏មិនលះបង់មរដកទ្រង់ដែរ
15 ពីព្រោះសេចក្ដីវិនិច្ឆ័យនឹងត្រឡប់តាមសុចរិតវិញហើយអស់អ្នកដែលមានចិត្តទៀងត្រង់គេនឹងប្រព្រឹត្តតាមដែរ
16 តើអ្នកណានឹងក្រោកឡើងជំនួសខ្ញុំ ដើម្បីទាស់នឹងពួកអ្នកដែលប្រព្រឹត្តការអាក្រក់តើអ្នកណានឹងឈរឡើងជំនួសខ្ញុំ ដើម្បីទប់ទល់នឹងពួកដែលប្រព្រឹត្តការទុច្ចរិត